ကချင်ပြည်နယ်၊ မိုးမောက်မြို့နယ်အတွင်းရှိ အလော့ဘွမ်အနီးတွင် KIA တပ်မတော်နှင့် စစ်ကောင်စီတပ်ဖွဲ့တို့အကြားတိုက်ပွဲပြင်းထန်နေပြီး နှစ်ဖက်အကျအဆုံးရှိသည်ဟု သိရသည်။
စစ်ကောင်စီတပ်ဖွဲ့မှ လက်နက်ကြီး၊ လက်နက်ငယ်ဖြင့် အပြင်းအထန်ပစ်ခတ်နေသဖြင့် နှစ်ဖက်စလုံးအကျအဆုံးရှိသည်ဟု KIA သတင်းနှင့်ပြန်ကြားရေးတာဝန်ခံဗိုလ်မှူးကြီးနော်ဘူ ကပြောသည်။
“တိုက်ပွဲကဆက်တိုက်ဖြစ်ပြီး အပြင်းအထန်ပစ်နေတော့ နှစ်ဦးနှစ်ဖက်စလုံး အကျအဆုံးတော့များနေတယ်”ဟု ပြောသည်။
စစ်ကောင်စီတပ်က ယမန်နေ့မှစတင်ကာ လက်နက်ကြီးများနှင့် တိုက်လေယာဥ်များအသုံးပြုကာ အလော့ဘွမ်တောင်ခြေရှိ KIA တပ်ရင်း ၂၅ဘက်သို့ အဆက်အပြတ် ပစ်ခတ်နေကြောင်းသူက ပြောသည်။
“မနေ့ကတည်းက အဆက်မပြတ်ပစ်နေတာ၊ လက်နက်ကြီးတွေနဲ့ ဗုံးတွေလည်းချတယ်။ အလော့ဘွမ်တောင်ခြေ မြို့သစ်ကုန်းလောဘက် KIA တပ်ရင်း (၂၅)ဘက်ရောပစ်တယ်။ အဲ့ဝန်းကျင်တစ်ဝိုက်က နေရာတကာကိုပစ်နေတာ။ မနေ့ကလေယာဉ်နဲ့ (၁၀)ပတ်လောက်ရှိမယ်ထင်တယ်။ ပတ်ပြီးပစ်နေတာ။ ဒီမနက်လည်း သုံးကြိမ်လေးကြိမ်လောက်ပတ်ပြီး အလော့ဘွမ်သွားတဲ့လမ်းမှာ ပစ်နေတာ”ဟု ပြောသည်။
အလော့ဘွမ်တပ်စခန်းအနီး (၅)ရက်ဆက်တိုက် တိုက်ပွဲအပြင်းအထန်ဖြစ်ပွားနေသောကြောင့် ဒေသခံပြည်သူများအားလုံးနီးပါး ထွက်ပြေးတိမ်းရှောင်နေရသည်ဟု သိရသည်။
စစ်ကောင်စီတပ်များတပ်ဆွဲထားသည့် အလော့ဘွမ်တပ်စခန်းကို ကေအိုင်အေတပ်မတော်က မတ်လ ၂၅ ရက်နေ့တွင် တိုက်ခိုက်သိမ်းပိုက်ခဲ့ပြီး လက်နက်ခဲယမ်းအများအပြားကို သိမ်းဆည်းနိုင်ခဲ့သည်။
ပုံ/ ၂၀၁၉ ခုနစ်က မိုးကောင်းမြို့နယ်အတွင်းတွေ့ရသော KIA တပ်မတော်မှ စစ်သည်များ။
သင့်ထင်မြင်ချက်ရေးပေးပါ