နှစ်ပေါင်း ၂၀ တွင် ပထမဆုံးအကြိမ်အဖြစ် မြစ်ကြီးနားမြို့တွင် စိုးရိမ်ရေမှတ်ကျော်လွန်ပြီး ရေဝင်ရပ်ကွက်အချို့တွင် ရေလွှမ်းမိုးမှုများဖြစ်ပေါ်လျက်ရှိကာ ကယ်ဆယ်ရေးများလုပ်ဆောင်နေသော်လည်း အရေးပေါ်အကူအညီများ လိုအပ်နေဆဲဖြစ်ကြောင်း သိရသည်။
ယနေ့ နံနက် ၉ နာရီခွဲ နောက်ဆုံးတိုင်းတာချက်အရ စိုးရိမ်ရေအမှတ်အထက် ၁၃၃၀ စင်တီမီတာသို့ရောက်ရှိနေပြီး တစ်နာရီလျှင် ၇ စင်တီမီတာ ၃ လက်မနှုန်းဖြင့် ဆက်လက်ရေမြင့်တက်နေသည်။
မြေနိမ့်ပိုင်းနှင့် ဧရာဝတီမြစ်ကမ်းနားတစ်လျောက်ရှိ ရပ်ကွက်များဖြစ်သော လယ်ကုန်း၊ ကြက်ပေါင်ခြံ၊ မြို့သစ်ကြီး၊ ဂျန်မိုင်ကောင်း၊ မြေမြင့်ကွက်သစ်၊ မန်ခိန်၊ စီတာပူ၊ ကချင်စု၊ ကျွန်းပင်သာ၊ ရွှေညောင်ပင်၊ အေးစေတီ၊ ရမ်ပူစသည့်ရပ်ကွက်များတွင် ရေဝင်ရောက်နေပြီး ပိတ်မိနေသူများရှိသောကြောင့် လာရောက်ကယ်ဆယ်ပေးရန် လူမှုကွန်ရက်စာမျက်နှာများတွင် ရေးသားဖော်ပြနေသည်ကိုလည်း တွေ့ရသည်။
ကချင်နှစ်ခြင်းခရစ်ယာန်အသင်းတော်အချို့ကလည်း ကူညီကယ်ဆယ်ရေးလုပ်ငန်းများ လုပ်ဆောင်နေသလို အချို့ရပ်ကွက်နေပြည်သူများက ကိုယ်ထူကိုယ်ထကူညီပေးမှုများလည်း တွေ့ရသည်ဟု ဒေသခံများကဆိုသည်။
မြစ်ကြီးနားမြို့တွင် ၂၀၀၄ ခုနှစ်က နောက်ဆုံးရေလွှမ်းမိုးမှုဖြစ်ပေါ်ခဲ့သဖြင့် နှစ်ပေါင်း ၂၀ တွင် ထပ်မံရေကြီးခြင်းဖြစ်သည်ဟု ဒေသခံများထံက သိရသည်။
