မြန်မာနိုင်ငံတစ်ဝှမ်းလုံးတွင် ညသန်းခေါင်အချိန် အင်တာနက်လိုင်းများ ဖြတ်တောက်ထားသောကြောင့် မြစ်ကြီးနားဒေသခံ အင်တာနက်ကုမ္ပဏီများသည် သုံးစွဲသူများ အဆင်ပြေစေရန် အစားထိုးဝန်ဆောင်မှုများပေးနေသည်ဟု သိရသည်။
နံနက် ၁ နာရီမှ ၉ နာရီအတွင်း အာဏာသိမ်းစစ်အုပ်စုက အင်တာနက်လိုင်းများ ဖြတ်တောက်ထားသောကြောင့် MyNet ဝိုင်ဖိုင်အင်တာနက်လိုင်းသည် လိုင်းဖြတ်တောက်သည့်နာရီကိုတွက်ပြီး သုံးရက်ဆိုလျှင် တစ်ရက်အစားထိုး ဝန်ဆောင်မှု ပေးသည်ဟု MyNet ရုံးမှ ဝန်ထမ်းတစ်ဦးက The 74 Media ကို ပြောသည်။
“ဖြတ်ထားတဲ့နာရီ ပေါင်းလိုက်တယ်။ ၁နာရီ ကနေ၉နာရီဆိုတော့ ၈နာရီကြာတယ်။ သုံးရက်ပြည့်လျှင် တစ်ရက်အစားထိုးပေးတယ်။ စျေးနှုန်းကတော့ မပြောင်းဘူး” ဟု သူက ပြောသည်။
နံနက်ပိုင်း အင်တာနက်ဖြတ်တောက်သောကြောင့် K-net ဝိုင်ဖိုင် အင်တာနက်သည် တစ်လကို ရာခိုင်းနှုန်းဖြင့်လျှော့ပေးသည်ဟု K-net မှ ဝန်ထမ်းတစ်ဦးက ပြောသည်။
” ကျွန်တော်တို့က တစ်လကို ၂၀%လျှော့ပေးတယ်။ စျေးပဲလျှော့ပေးတာ”ဟု သူကပြောသည်။
သုံးစွဲသူများသည့်အတွက် နာရီနှင့်တွက်ပြီး စျေးနှုန်းလျှော့ပေးပါသည်ဟု Manaw Link မှ ဝန်ထမ်းတစ်ဦးကပြောသည်။
” လစဥ်ကြေးနဲ့ဆို ပိုက်ဆံလျှော့ပေးတယ်။အချိန်တွေ နာရီတွေကောက်ပြီးတွက်ပေးလိုက်တာ။ သုံးလစာ ခြောက်လစာ တစ်နှစ်စာ plan ချုပ်သွင်းထားတဲ့လူတွေကိုကျတော့ နောက်ထပ်ပြည့် ပြန်ပေါင်းပြီး လျှော့ပေးနေပါတယ်”ဟု သူကပြောသည်။
နံနက်ပိုင်းအင်တာနက်လိုင်းဖြတ်တောက်သည့်အတွက် ဝိုင်ဖိုင်အင်တာနက်စျေးနှုန်းလျှော့ပေးသည်ဟု Knet ဝိုင်ဖိုင် အင်တာနက်ကို
လချုပ်ဖြင့် သုံးစွဲသူက ပြောသည်။
“လျှော့ပေးတယ် (၁)နာရီမှ ( ၉)နာရီ လိုင်းြဖတ်လို့ဆိုပြီး ၄၀၀၀ လျှော့ပေးတယ်” ဟု သူကပြောသည်။
ဒေတာအင်တာနက်လိုင်းများကို စစ်အာဏာသိမ်းကောင်စီမှ မတ်(၁၆)ရက်နေ့မှ ဖြတ်တောက်ထားသဖြင့် မြန်မာတစ်ဝန်းလုံး ဝိုင်ဖိုင်အင်တာနက်အသုံးများလာသည်ဟု သိရပါသည်။
သင့်ထင်မြင်ချက်ရေးပေးပါ