ကချင်ပြည်နယ်၊ ဟိုပင်မြို့နယ်၊ တကွင်းကျေးရွာတွင်
စိတ်ကျန်းမာရေးချို့ယွင်းနေသော အသက် ၃၀ ကျော်အရွယ် အမျိုးသားတစ်ဦးကို စစ်ကောင်စီတပ်မှ ပစ်ခတ်ခဲ့သောကြောင့် ဝမ်းဗိုက်တွင် ကျည်ထိမှန်ခဲ့ကြောင်း ဒေသခံများထံမှ သိရသည်။
ပစ်ခတ်ခံခဲ့ရသော အဆိုပါအမျိုးသားမှာ ယနေ့ နေ့လည် ၂ နာရီခန့်က စစ်ကောင်စီ၏ တပ်ရင်း ၄၀ အနီးတွင် ပစ်ခတ်ခံရခြင်းဖြစ်ကြောင်း ဒေသခံတစ်ဦးက The 74 Media ကို ပြောသည်။
“မြက်ရိတ်နေတဲ့အချိန် စစ်သားက ရပ်ခိုင်းတာ အဲ့တာကို သူက ကြောက်လို့ထွက်ပြေးတာ၊ ထွက်ပြေးတာကို စစ်သားက အနောက်ကနေ သေနတ်နဲ့လိုက်ပစ်တာ” ဟု ပြောသည်။
ပစ်ခတ်ခံရသော အဆိုပါအမျိုးသားမှာ စိတ်ကျန်းမာရေးချို့ယွင်းနေသူတစ်ဦးပြီး ယခုအချိန်တွင် ကချင်ပြည်နယ်ရှိ ဆေးရုံတစ်ရုံတွင် ဆေးကုသမှုခံယူနေကြောင်း သူက ဆက်ပြောသည်။
အဆိုပါ အမျိုးသား၏ ဒဏ်ရာပြင်းထန်မှုရှိ/မရှိကိုမူ The 74 Media က ဆက်လက်စုံစမ်းနေသည်။
ယမန်နေ့ည ၇ နာရီဝန်းကျင်ခန့်က ဟိုပင်ဂေါက်ကွင်းရှေ့ရှိ တပ်ရင်း ၄၀၏ အရှေ့အနီးတစ်ဝိုက်တွင် စစ်ကောင်စီမှ ပစ်ခတ်မှုများရှိခဲ့ကြောင်းသိရသည်။
သင့်ထင်မြင်ချက်ရေးပေးပါ