ကချင်ပြည်နယ်၊ မံစီမြို့နယ်၊ နမ့်မဖွဲ ကျေးရွာအုပ်စု၊ မိတုံကုန်းကျေးရွာတွင် ဩဂုတ်လ ၆ ရက် မွန်းလွှဲ ၂ နာရီခွဲခန့်က မိုင်းနင်းမိ၍ ယောကျာ်းလေးတစ်ဦး သေဆုံးသွားကြောင်းသိရသည်။
မိတုံကုန်းကျေးရွာရှိ ခ.မ.ရ (၃၁၉) နှင့် အမြောက်တပ် (၃၅၂) ကြားတွင်ရှိသည့် တောင်ယာကုန်းတွင် ကျွဲကျောင်းသွားရာမှ မိုင်းနင်းမိခြင်းဖြစ်သည်ဟု အမည်မဖော်လိုသူ သတင်းရင်းမြစ်တစ်ဦးက The 74 Media ကိုပြောသည်။
“မိတုံကုန်းကျေးရွာ အနောက်ဘက်က။ တောင်ယာကုန်းလို့ပြောတာပဲ။ ၃၁၉ တပ်နဲ့ အမြောက်တပ်ကြား တောင်ယာကုန်း မှာ ကျွဲကျောင်းသွားတုန်းက ဖြစ်တာ။ မိုင်းနင်းမိပြီးဝောာ့ ဗန်းမော်ဆေးရုံကိုပို့တယ်။ ဗန်းမော်ဆေးရုံကနေ မ.စ.ရ (၁၁) ကိုပြန်ပို့ပေးခဲ့တယ်ပေါ့။ ဆေးရုံကိုတော့ အချိန်မီရောက်သွားပေမယ့်လည်း ခွဲစိတ်ခန်းဝင်ခါနီး ၇ နာရီ ၂၀ လောက်မှာ ဆုံးသွားတယ်လို့သိရတယ်” ဟုသူပြောသည်။
သေဆုံးသူသည် ၁၆ နှစ်အရွယ် မောင်နော်ဆန့်ဆိုသူဖြစ်ပြီး ညာဘက်ခြေသလုံးအောက်ပြတ်၍ ဘယ်ခြေထောက်နှင့် လက်နှစ်ဖက်တွင် မိုင်းစထိမှန်ခဲ့ကြောင်း သူကဆက်ပြောသည်။
မံစီမြို့နယ် နာဇရပ်ရပ်ကွက်တွင် ဇွန်လ ၈ ရက်နေ့ကလည်း ကျောင်းသွားပို့သော ပြည်သူတစ်ဦး လက်နက်ကြီးစ ထိမှန်ခဲ့သည်။
ကချင်ပြည်နယ်တွင်ဖြစ်ပွားသည့် စစ်ကောင်စီထောင်ထားသည့် မိုင်းနင်းမိမှု၊ ရမ်းသမ်းပစ်ခတ်မှု၊ လက်နက်ကြီးပစ်ခတ်မှုများကြောင့် ဧပြီလမှ ဇူလိုင်လအတွင်း အသက်မပြည့်သည့် ကလေးသူငယ် (၂) ဦးသေဆုံးခဲ့ပြီး ဖြစ်သည်။
သင့်ထင်မြင်ချက်ရေးပေးပါ