ချင်းပြည်နယ်၊ ကန်ပက်လက်မြို့၊ ဆယ်မိုင်ကုန်းရပ်ကွက်နေ အငြိမ်းစား ရဲဝန်ထမ်းတစ်ဦးသည် ယနေ့ မွန်းလွှဲ တစ်နာရီဝန်းကျင်က စစ်ကောင်စီ ထောင်ထားသော မိုင်းနင်းမိ၍ ခြေထောက်တစ်ဖက်ဆုံးရှုံးသွားကြောင်း သိရသည်။
စစ်ကောင်စီတပ်စွဲထားသော ရန်အောင်ရတနာစေတီအနီးတွင် အသီးအရွက် သွားရောက်ခူးယူစဉ် မိုင်းနင်းမိခြင်းဖြစ်ကြောင်း နီးစပ်သူတစ်ဦးက The 74 Media ကိုပြောသည်။
“စစ်သားတွေထောင်ထားတဲ့ မိုင်းကိုနင်းမိတာပါ။ ခြေထောက်တစ်ဖက်ပြတ်သွားပါတယ်။ ပင်စင်ထုတ်ပြီး အိမ်ပြန်ရောက်ပြီးနောက်ပိုင်း ဟင်းခူးထွက်ရင်း မိုင်းနင်းမိတာပါ။ အခုမိုင်းနင်းမိတဲ့နေရာက စစ်ကောင်စီတွေတပ်စွဲထားတဲ့ နေရာနဲ့ မဝေးပါဘူး” ဟု ပြောသည်။
ကြက်ခြေနီအဖွဲ့မှ မိုင်းနင်းမိသူအား အရေးပေါ်ပြုစုပေးခဲ့ပြီး ဆေးရုံသို့ ပို့ဆောင်လိုက်ပြီ ဖြစ်ကြောင်း သူကဆက်ပြောသည်။
မိုင်းနင်းမိသူမှာ အသက် ၆၅ နှစ်အရွယ် ဦးလိန်းရွှီဖြစ်ပြီး အငြိမ်းစား ရဲဝန်ထမ်းတစ်ဦးဖြစ်သည်ဟု သိရသည်။
ကန်ပက်လက်မြို့ရှိ အ.ထ.က ကျောင်း၊ ရဲစခန်းနှင့် ရန်အောင်ရတနာစေတီတို့တွင် စစ်ကောင်စီမှတပ်စွဲထားကြောင်းသိရသည်။
သင့်ထင်မြင်ချက်ရေးပေးပါ