စစ်ကိုင်းတိုင်း တန့်ဆည်မြို့၊ လမ်းဆုံ ဈေးသစ်အနောက်တွင် ယနေ့ စက်တင်ဘာ ၄ ရက်နေ့ ညနေ ၅ နာရီခွဲခန့်က စစ်ကောင်စီတပ်ဖွဲ့ဝင် ၂ ဦးကို တန့်ဆည်ပြည်သူ့ရဲဘော်များ (Taze People Comrades) မှ လုပ်ကြံသတ်ဖြတ်ခဲ့ကြောင်း သိရသည်။
ရပ်ကွက်ချဲဒိုင်မှ ဆက်ကြေးသွားကောက်ချိန် တန့်ဆည်ပြည်သူ့ရဲဘော်များ (Taze People Comrades)က ပစ်သတ်ခဲ့ခြင်းဖြစ်သည်ဟု အမည်မဖော်လိုသည့် ဒေသခံတစ်ဦးက The 74 Media ကိုပြောသည်။
“အဲ့နှစ်ယောက်က ချဲရောင်းတဲ့သူတွေဆီကနေ ဆက်ကြေးကောက်လေ့ရှိတာလေ။ အဲ့တာ လာတဲ့အချိန်မှာ ပစ်သတ်ခံရတာပေါ့နော်။ အဲ့ေနာက် ရဲကားလာတော့ ရဲကားလည်း ဗုံးခွဲခံရတယ်။ ရဲကားနောက်ပွင့်သွားတယ်” ဟုပြောသည်။
သေဆုံးသူ စစ်ကောင်စီတပ်ဖွဲ့ဝင် နှစ်ဦးသည် နယ်ထိန်းရဲတပ်ကြပ် မျိူးထက်ဦးနှင့် ရဲတပ်သားအောင်သူဝင်းတို့ဖြစ်ကြောင်း သူကဆက်ပြောသည်။
စစ်ကိုင်းတိုင်း တန့်ဆည်မြို့နယ်တွင် ယမန်နေ့ စက်တင်ဘာလ ၃ ရက်နေ့တွင်လည်း ကံထူးမရဲစခန်းမှ ထွက်ခွာလာသော စစ်ကောင်စီတပ်၏ ယာဉ်တန်းကို ပြည်သူ့ကာကွယ်ရေးတပ်ဖွဲ့ PDF များက မိုင်းခွဲတိုက်ခိုက်ခဲ့သည်။
သင့်ထင်မြင်ချက်ရေးပေးပါ